von elisabeth am 31.12.2013 - 19:01 Uhr | melden
Heid
am oidjoahsdog
mecht i daungschei song.
Daungschei
fia mei lem.
Du host ma 50 moi
oda öfta
vasichat,
dassd di gfreid host,
wiasd mi griagt host.
i glaub das wirkli
i bin jo a a mami
i woass,
wia ma si
üwa jeds kind gfreit.
Daungschei
fia meine gschwista.
Se san do,
waun mas braucht,
se haum di hoin,
und se hoind a mi
oiwei öfta.
Daungschei
fia dei lem.
Es hod ma glernt,
wia ma bescheidn wird,
wia ma zfriedn is,
wia ma mid aundane leid
guad zaumlebt und auskimd.
Dei oidwean hod ma beibrocht,
das ma sis ned aussuacha kau,
wia ma oid wird,
owa das ma sis oiwei
so richtn kau,
das ma guad is mid
seine leid,
das ma ausred, wos gred ghead,
das ma stü is, wo ma stü sei soid.
Daun kau ma getrost
zu jeda zeit
gei va dahoam,
umi
ins nächste lem,
dorthi, wo ma gaunz dahoam is,
dorthi, wo ma bleim kau
und nima fort muaß.
Des oiss und nu vü mehr
host du mir beibrocht.
Daung da schei, Muadda.
